Një grua në Fushë Kosovë ka tentuar që ta mbysë fëmijën e saj 6-vjeçar. Mediat vendore raportojnë se ekipet emergjente kanë ndërhyrë në momentet e fundit para se ajo ta hidhte nga ballkoni i banesës fëmijën e saj.
Tutje bëhet e ditur se gruaja që tentoi ta kryej këtë veprim, vuan nga sëmundje të shëndetit mendor.
Sipas Gazetës Express, gruaja jeton vetëm me fëmijën e saj.
Gazeta Sinjali ka kontaktuar me Policinë e Kosovës për të marrë më shumë detaje, por të njëjtit nuk kanë kthyer përgjigje.
Ngjarje e rëndë në Fushë Kosovë, raportohet se një grua tentoi ta hedh nga ballkoni djalin e saj 6-vjeçar
PDK-ja e LDK-ja mobilizohen për “rrugën përpara pa Kurtin”
Dy partitë opozitare, Partia Demokratike e Kosovës dhe Lidhja Demokratike e Kosovës kanë paralajmëruar mobilizime partiake e me akterë të tjerë si përgjigje për “situatën në të cilën gjendet vendi”.
Duke e akuzuar Qeverinë dhe kryeministrin Albin Kurti se po e izolon Kosovën dhe se po ia humb përkrahjen ndërkombëtare, krerët e dy partive opozitare, Memli Krasniqi i PDK-së dhe Lumir Abdixhiku i LDK-së kanë paralajmëruar “rrugë të re përpara”.
Lideri i PDK-së të premten ka thënë se në këtë periudhë, kur Kosova po përballet me sanksione nga ndërkombëtarët për shkak të çështjes së veriut, “ka qenë vazhdimisht në terren duke bashkëbiseduar me anëtarësinë dhe me qytetarë anekënd vendit, të cilët janë të shqetësuar me gjendjen e rëndë në Kosovë”.
Ai ka paralajmëruar se pas “mbi 150 takimeve” gjithandej vendit, ka ftuar mbledhjen e Këshillit Drejtues të PDK-së. Ka deklaruar se kjo mbledhje do të jetë për gjendjen e rëndë në vend dhe për “rrugën që është para nesh”.
“Mbi të gjitha, për vendimet dhe veprimet që i kërkon kjo periudhë sfiduese. Situata nuk është normale dhe nuk mund ta simulojmë normalitetin. Qytetarët kanë nevojë për qartësi në këtë kohë konfuzioni. Dhe një gjë është më se e qartë: Kosova nuk mund të mbetet edhe më tutje peng e tekeve të Albin Kurtit”, ka shkruar Krasniqi në Facebook për paralajmërimin për mbledhjen e KD-së së PDK-së.
Një ditë më parë, kreu i LDK-së, Lumir Abdixhiku, ka paralajmëruar mobilizim tjetër. Ai ka thënë se do të ftojë akterë të shoqërisë civile, akademisë, sektorit privat, mërgatës, media e opinionistë për të ndërtuar “rrugën e vërtetë”. Ai ka thënë se “Kosova ka rrugë të re”, e në të sipas tij, “nuk ka Albin Kurtin”.
“Këtë rrugë duhet ta bëjmë ne”, ka shkruar ai duke kërkuar “ndihmën e të gjithëve”.
“Do t’ua prezantoj edhe planin e LDK-së për kapërcimin e izolimit e krizës. Në këto takime do të kërkoj mbështetje për ndërtimin e masës kritike e zërit alternativ që bota perëndimore duhet ta dëgjojë nga ne tani. Vendi ynë ka një të ardhme ndryshe nga çfarë na projektohet sot”, ka vazhduar Abdixhiku.
Pavarësisht deklarimeve në Facebook, mocioni i mosbesimit, i iniciuar nga partia tjetër opozitare, Aleanca për Ardhmërinë e Kosovës, nuk ka marrë mbështetjen e PDK-së dhe LDK-së. Ditë më parë, kreu i kësaj partie, Ramush Haradinaj, i ka akuzuar të dyja partitë për mospërkrahje të mocionit për rrëzimin e Qeverisë Kurti.
Gjuha e opozitës ndaj Qeverisë është ashpërsuar pas qëndrimeve kritike e paralajmërimeve të sanksioneve nga ndërkombëtarët ndaj Kosovës, për shkak të tensioneve në veri. Që nga 26 maji, në veri të vendit ka pasur tensione, pasi serbët lokalë nisën protesta kundër hyrjes së kryetarëve të rinj të komunave në katër komunat veriore, në objektet komunale. Protestat në fillim qenë të dhunshme e më pas u qetësuan. Situata u përshkallëzua në mes të qershorit kur Serbia kidnapoi brenda territorit të Kosovës tre policë të Policisë së Kosovës.
Pas tensioneve, kryeministri Albin Kurti dhe presidenti i Serbisë, Aleksandar Vuçiq, u ftuan për takim urgjent në Bruksel, por Vuçiqi refuzoi takim trepalësh.
Bashkimi Evropian ka paralajmëruar sanksione ndaj Kosovës. Të premten, në një samit të BE-së në Bruksel është bërë thirrje për shtensionim të menjëhershëm e është paralajmëruar se nëse kjo s’bëhet do të ketë “pasoja negative”.
PDK-ja kërkon pozitën e kryesuesitnë Prishtinë
Partia Demokratike në Prishtinë po kërkon pozitën e kryesuesit të cilën deri në dorëheqjen e Fehmi Kupinës nga partia, e mbante Lidhja Demokratike e Kosovës.
Është PDK-ja që i mori Vetëvendosjes asamblisten, Berna Saraçi, dhe ia ktheu pushtetit shumicën në Kuvendin Komunal të Prishtinës. Për këtë, PDK-ja kërkon më shumë “hise” në bashkëqeverisjen me LDK-në e Lumir Abdixhikut.
Që PDK-ja po e kërkon postin e kryesuesit e ka konfirmuar Leutrim Retkoceri, shef i grupit të këshilltareve komunalë të kësaj partie. Retkoceri ka thënë se ende nuk e kanë një emër dhe se janë në bisedime me partnerin e koalicionit për këshilltarin komunal që do ta udhëheqë Kuvendin Komunal.
Në seancën e fundit të kuvendit komunal përveç Saraçit me pushtetin qëndruan edhe Endrit Zabërgja i Nismës dhe Sami Boroci i AKR-së. Vetë Boroci e ka konfirmuar që është në bisedime me LDK-në, por që ende qëndron anëtar i AKR-së. Madje Boroci i është bashkuar pushtetit edhe në shkarkim të vetës si aksionar në ndërmarrjet publike nga lista e opozitës.
Nënkryetari i Prishtinës, Alban Zogaj ka thënë se nuk kanë zgjedhur aksionarë të rinj pasi që vetëm e kanë anuluar vendimin e 8 qershorit të cilin e cilësoi si të jashtëligjshëm. Zogaj nuk ka treguar nëse do të pajtohen me PDK-në për pozitën më të lartë në Kuvendin Komunal, atë të kryesuesit.
Derisa Fehmi Kupina është shkarkuar nga pozita e kryesuesit dhe deri në zgjedhjen e një të riu, mbledhjet do të udhëhiqen nga Ajet Brajshori i LDK-së.
Rama për muxhahedinët: S’mund ta përdorin Shqipërinë si llogore të luftës së tyre
Kryeministri Edi Rama ka folur për herë të parë për opozitën iraniane MEK që pas operacionin e policisë në kampin Ashraf në Manzë.
Në një intervistë për median gjermane Der Spiegel, Rama është shprehur se ata janë të mirëpritur, por me kusht që mos ta përdorin Shqipërinë si një platformë për operacionet e tyre politike.
Sipas Ramës, mysafirët iranianë e kanë shkelur vazhdimisht këtë marrëveshje, por nuk do të lejohen ta përdorin Shqipërinë si llogore të luftës së tyre.
“E kuptojmë inatin kundër regjimit në vendin e tyre. Por vendi ynë të përdoret si llogore në një luftë që nuk është e jona, nuk funksionon! Sigurisht që ata kanë çdo të drejtë të luftojnë për lirinë e tyre, por për ta bërë këtë duhet të largohen nga Shqipëria”, është shprehur Rama për median gjermane.
Apeli i gazetares: Kosova s’do gjejë qetësi po nuk dëgjoi SHBA-të…
Kozeta Turishta gazetare shqiptare në SHBA tha në një intervistë për Euronews Albania se situata në Kosovë është mjaft shqetësuese për Amerikën.
Ajo tregoi se çështja e Kosovës ka shkuar deri në Kongresin Amerikan, ku senatorët kanë kërkuar një tryezë me aleatët ndërkombëtare që të diskutojë lidhur me konfliktin aktual mes Kosovës dhe Serbisë.
“Është mjaft shqetësuese për Amerikën sa është diskutuar edhe në Kongres. Kanë qenë vetë senatorët që i kanë bërë thirrje përmes një letre që të ulen në një tryezë dhe të diskutojnë lidhur me Kosovën, të bëhen palë edhe me aleatë të tjerë ndërkombëtarë. Vetëm një konferencë e përbashkët ndërkombëtare është zgjidhja, në të kundër Serbia me Kosovën nuk do gjejë qetësi. Dihet roli i Amerikës në pavarësinë e Kosovës dhe janë 600 trupa ushtarake të KFOR në Kosovë. Ashtu sikurse liderët e Bashkimit Evropian që kanë kundërshtuar veprimet e Kurtit. Zgjidhja më e mirë është që serbët të kthehen në institucione dhe Kosova të shpallë zgjedhje të reja”, tha gazetarja.
“Zgjodhi Tiranën sepse SHBA e konsideron kryeqytetin e Ballkanit”- Analisti për vizitën e Clintonit
“Për Ballkanin Perëndimor, Tirana është absolutisht qyteti më i besueshëm”. Ishte kjo deklarata e juristit Kreshnik Spahiu në një intervistë për Euronews Albania.
Ai komentoi se prania e Bill Klinton në Tiranë më 4 korrik vjen si pasojë e balancës që ka ruajtur Shqipëria në krizat rajonale.
Mbi 4 milionë euro u kushtoi 741 haxhinjve nga Kosova shkuarja në haxh
5 mijë e 700 euro ka kushtuar këtë vit shkuarja në haxh, obligim të cilin nga Kosova e kanë kryer 741 besimtarë të fesë islame.
Bashkësia Islame e Kosovës ka njoftuar se grupi i parë i haxhinjve, është kthyer sot në Kosovë.
“Bashkësia Islame e Kosovës njofton se edhe grupet e tjera të haxhive pritet që të arrijnë në Kosovë sipas orareve të parapara. Këtë vit nga Kosova, haxhin e kryen 741 haxhi”, thuhet tutje në njoftimin e tyre.
Këtë vit, shkuarja në haxh ka kushtuar shtrenjtë, gjë për të cilën pati edhe shumë reagime, rreth 5 mijë e 700 euro.
Duke e llogaritur këtë shifër me numrin e haxhinjve, del se janë dhënë 4 milionë e 223 mijë e 700 euro.
Shkarkohet kryesuesi i Kuvendit Komunal, Fehmi Kupina
Me 26 vota pro dhe 1 abstenim, asamblistët e Kuvendit Komunal në Prishtinë, e shkarkuan Fehmi Kupinën nga pozita e kryesuesit.
Një asamblist nuk mori pjesë në votim.
Më parë u bë e ditur se partitë opozitare në Prishtinë kanë ngrehur padi ndaj kryetarit të Prishtinës, Përparim Rama, me arsyetimin se ka thyer ligjin për ndërmarrjet publike.
Tërnava në mesazhin e Kurban Bajramit: Lutemi që të ketë sa më pak konflikte, ngatërresa e luftëra
Myftiu i Kosovës, Naim Tërnava me rastin e festës së Kurban Bajramit, në fjalimin e tij të përvitshëm, tha se kjo festë gjithmonë ka përçuar formën më të mirë të mundshme shpresën, begatinë, solidaritetin, ndihmën për tjetrin, urtësinë, paqen e mirëkuptimin.
Kreu i BIK-ut ka uruar besimtarët për siç tha festën e madhe të Kurban Bajramit, duke lutur Zotin për shëndet, mbarësi, begati, dashuri e harmoni. Ai tha se të gjithë besimtarët luten që në këtë kohë trazirash, luftërash, pasiguri, konflikte e frikë bota të ketë sa më pak konflikte, ngatërresa e luftëra.
“Festa e Kurban Bajramit te ne vazhdimisht ka përçuar në formën më të mirë të mundshme shpresën, begatinë, solidaritetin, ndihmën për tjetrin, urtësinë, paqen e mirëkuptimin, vlera këto që shoqërisë i japin kuptim dhe këtë na e kërkon edhe Krijuesi ynë”.
“Sot po jetojmë në një kohë trazirash, luftërash, pasiguri, konflikte e frikë, në këtë ditë të madhe, në vigjilje të Kurban Bajramit, lutemi që mesazhet dhe porositë që i bartë kjo festë të kuptohen drejtë nga të gjithë; lutemi po ashtu që bota të ketë sa më pakë konflikte, ngatërresa, luftëra e çrregullime. Festa e Kurban Bajramit ka edhe domethënien e paqes, drejtësisë, unitetit e mirëkuptimit. Duke ju uruar për festën e madhe të Kurban-Bajramit, lus Zotin për shëndet, mbarësi, begati, dashuri e harmoni në familjet tuaja”.
Duke folur për kushtet e islamit, Tërnava përmendi haxhin, duke shtuar se në mesin e miliona hanxhinjve nga e gjithë bota, të cilët gjenden në Arafat, janë edhe besimtarët nga Kosova të cilët në formën më të mirë me lutje e adhurim, shprehin me ndjesinë më të thellë besimin dhe përkushtimin e tyre ndaj Krijuesit të gjithësisë.
Sipas tij, prerja e kurbanit në Ditën e Bajramit është një ibadet tjetër shtesë që siç thotë, argumenton po ashtu shpirtin e bindjes për Zotin.
“Më lejoni që në këtë ditë të madhe të Arafatit, në prag të festës së Kurban-Bajramit, t’u drejtohem me urimet e përgëzimet më të mira, duke lutur Zotin xh.sh. që t’ju begatoj me shëndet, harmoni, mbarësi e mirëqenie. Në mesin e miliona hanxhinjve nga e gjithë bota, të cilët sot gjenden në Arafat, janë edhe besimtarët tanë nga Kosova dhe viset tjera, të cilët në formën më të mirë me lutje e adhurim, të përkushtuar, pa dallim statusi shoqëror, gjinie, etnie, gjuhe e origjine, shprehin me ndjesinë më të thellë besimin dhe përkushtimin e tyre ndaj Krijuesit të gjithësisë”.
“Kryerja e Haxhit përmban në vete urtësi e begati të shumta. Haxhi na rikujton udhëtimin për tek Zoti xh.sh., duke pasur për qëllim që haxhiu të kthehet i pa mëkate. Edhe prerja e kurbanit në Ditën e Bajramit është një ibadet tjetër shtesë ndërkaq, argumenton po ashtu shpirtin e bindjes për Zotin dhe në të njëjtën kohë ka për qëllim qoftë edhe për një kohë të caktuar mbylljen e hendekut dhe ndasive mes shtresave të ndryshme shoqërore, duke rritur bashkëpunimin dhe duke afruar ndihmën dhe duke i dhënë dorën njëri-tjetrit”.
“Baba ktu”, qytetari vendos foton e Kurtit në veturë
Një qytetar ka vendosur fotografinë e kryeministrit Albin Kurti në pjesën e prapme të veturës së tij, raporton Express.
Vetura ku është vendosur fotografia e Kurtit krahas hartës së Mitrovicës dhe ku shkruhet “baba ktu”, është parë duke qarkulluar sot në Prishtinë.
Ndryshe, situata në veri të vendit është tensionuar nga 26 maji, kur Policia e Kosovës asistoi kryetarët e tri komunave veriore, Leposaviq, Zveçan dhe Zubin Potok, që të futen në zyret e tyre, përkundër rezistencës së serbëve lokalë.
Situata eskaloi më 29 maj, kur serbët lokalë u përplasën me ushtarët e KFOR’it të cilët ruanin objektet komunale. Atë ditë mbetën të lënduar 30 ushtarë të KFOR’it, njëmbëdhjetë të kontingjentit italian dhe 19 të tjerë të kontingjentit hungarez.
Lëndimet e tyre përfshijnë fraktura të gjymtyrëve, djegie, ndërkohë që 3 ushtarë hungarez janë të plagosur me armë zjarri.
Komandanti i KFOR-it, Angelo Michelle Ristuccia, ka deklaruar se po të mos ndërhynte KFOR’i në veri, “tani do të ishim duke mbajtur zi për të vdekurit”.
“Nëse nuk do të kishim ndërhyrë, tani do të ishim duke mbajtur zi për të vdekurit”, ka deklaruar Ristuccia.
Faktori ndërkombëtar ka bërë thirrje të vazhdueshme për uljen e tensioneve tensioneve dhe, së fundi, disa kanë kërkuar mbajtjen e zgjedhjeve të reja në veri.