Shpëtim Hajdaraj, djali i veprimtarit të vrarë të Lidhjes Demokratike të Kosovës (LDK), Smajl Hajdaraj, është i ftuar në “Pressing” të T7, ku po rrëfen për vrasjen e babait të tij më 17 janar 2002.

Ai ka thënë se nuk mund të përmend emra, pasi beson që është një vendim paraprak politik që ka vendosur për vrasjen e babait të tij, Smajl Hajraraj.

Por dyshimet e tij janë për siç e quan ai “binomi SHIK-UDB”.

“Duhet me fillu nga kush e krijoi këtë frymë vëllavrasje. Normalisht dyshimet shkojnë te këta. Tash se cili është roli i secilit individ, këtu nuk ka qenë çështje e një individi që iu ka tek me vra Smajlin. Ka qenë një vendim më i lartë, që unë e quaj ka qenë një lloj binomi SHIK-UDB, ka pas elemente brenda saj”.

“Atyre pjesëtarëve të  SHIK’ut nuk iu ka tek me ardh me vra Smajlin. Unë besoj dhe mendoj logjikshëm se ka qenë një vendim paraprak politik. Tash unë nuk mund të them valla ky person e ka marrë atë vendim, sepse mendoj që ka pasur një rreth më të gjerë të njerëzve”, ka thënë ai.

Përparim Rama, kryetar i Prishtinës,  ka reaguar pas dëmtimit të një pjese të kulmit të objektit të Komunës së Re si pasojë e erërave. Një vajzë ka mbetur e lënduar.

Rama përmes një postimi në Facebook, ka kërkuar nga organet kompetente që ta hetojnë këtë rast.

”Sot, në objektin e Kryeqytetit në lagjen “Arbëria” për shkak të erërave të forta ka kolapsuar një pjesë e kulmit, ku për pasojë një person është lënduar dhe tani është nën kujdes mjekësor”.

“Menjëherë kam kontaktuar me familjarët e të lënduarës për t’iu qëndruar pranë në këto momente. Lutemi për shërimin e saj të shpejtë dhe të plotë. Si Kryetar i Kryeqytetit kërkoj nga organet kompetente që të hetojnë rastin në tërësi dhe të marrin të gjitha masat dhe veprimet në pajtim me legjislacionin në fuqi”, ka shkruar Rama të enjten.

Kuvendi është mbledhur sot për të shqyrtuar një rezolutë të opozitës, përmes së cilës po kërkohet anulimi i vendimit për shtrenjtimin e rrymës dhe heqja e bllok tarifës. Në orën që ishte paraparë të fillonte seanca, Ministri i Financave, Hekuran Murati, u lajmërua në Facebook, duke dhënë lajmin se ministria do të japë subvencione për kategoritë e cënueshme. Rezoluta e PDK’së u cilësua si “koti” nga Ministrja Artane Rizvanolli. Ajo tha se Kosova ka çmimin më të lirë të rrymës në Evropë, pavarësisht rritjes së tarifave. Akuzoi opozitën se po tenton t’i mashtrojë qytetarët. Përplasje pati mes Mimoza Kusarit dhe Hykmete Bajramit.

Ankesat e qytetarëve për faturat e larta të rrymës për muajin dhjetor i kanë bërë bashkë sot deputetët e Kuvendit të Kosovës, në një seancë të jashtëzakonshme për të shqyrtuar një rezolutë për këtë punë. Seanca ishte paraparë të fillonte në orën 10:00, por deputetët nuk u mblodhën deri gati pas një ore.

Pikërisht në kohën kur ishte paralajmëruar të fillonte seanca, Ministri i Financave, Punës dhe Transfereve, Hekuran Murati, zgjodhi ta jepte një lajm që lidhet me temën që do të diskutonte Kuvendi, sikur për ta larguar vëmendjen.

Ai njoftoi se ka filluar subvencionimi i energjisë elektrike për familjet e cënueshme.

“40,620 familje që janë kualifikuar në grupin e parë, do të përfitojnë nga subvencionimi i energjisë elektrike. Subvencionimi do të bëhet direkt në faturë, i ndarë në 6 këste mujore, duke filluar nga fatura e janarit.”, shkroi Murati në Facebook. Ai sqaroi se subvencionimi bëhet në kuadër të pilotimit të Programit për Mbështetjen e Familjeve të Cënueshme, që mbështetet financiarisht nga Bashkimi Evropian.

Kuvendi nisi punimet me prezantimin e Rezolutës së PDK’së nga deputeti Ferat Shala. Përmes kësaj rezolute, u kërkua që të anulohet vendimi për shtrenjtimin e energjisë elektrike dhe heqja e bllok tarifës.

Pas tij, Shefi i Grupit Parlamentar të PDK’së, Abelard Tahiri, bëri një krahasim të çmimit të rrymës që e blen KESCO dhe çmimit që u faturohet pastaj konsumatorëve. Ai e quajti këtë plaçkitje.

“Nëse e shohim çmimin për megavat, se sa e merr KESCO në KEK është vetëm 2 euro e 90 centë, pra kushton kilovati. Ndërsa, neve qytetarëve me tarifën e ulët na e faturon 3.34 centë, me tarifën e ulët pjesën e natës, ndërsa me tarifën e lartë nën 800 kWh është 7.79 centë. Pra, më shumë se 100 përqind.  Nëse shkojmë mbi 800kWh, tarifa e ulët është 6.81 centë, ndërsa tarifa e lartë mbi 800 kWh shkon 14.45 centë. Pra, prej 2 e 90 sa e merr në KEK, neve me tarifën e lartë mbi 800 kWh na e faturon 14 euro e gjysmë, pra gati 500 përqind”, deklaroi Tahiri.

Një krahasim e bëri edhe Shefi i Grupit Parlamentar të LDK’së, Arben Gashi. Ai tha se Qeveria Kurti ia shet 3 centë kilovatin KEDS-it, ndërsa sipas tij, KEDS-i atë kilovat ia shet 14 centë qytetarit.

“Qeveria e Kosovës aksionar si aksionar, ia shet me 3 centë kilovatin KEDS-it, e KEDS-i atë kilovat ia shet 14 centë qytetarit të Kosovës”, është shprehur deputeti Gashi.

Gashi kujtoi edhe vitin 2015 kur Vetëvendosje protestonte për ta kundërshtuar çmimin e lartë të energjisë.

“Sot me Kurtin në pushtet rryma është dyfish më e lartë se atëherë” tha Gashi.

Pas këtyre deklaratave, Ministrja Artane Rizvanolli, doli në foltore dhe tha se Kosova ka çmimin më të ulët të energjisë në rajon dhe Evropë, pavarësisht rritjes së tarifave.

Rizvanolli e cilësoi rezolutën e propozuar nga PDK’ja si “rezolutë koti”, derisa tha se opozita po tenton t’i mashtrojë qytetarët, meqë çmimi i rrymës nuk ulet me të tilla metoda.

Duke folur për propozimin e PDK’së për heqjen e bllok tarifës, Rizvanolli tha se me heqjen e bllok tarifës do të uleshin faturat për 4 mijë e 700 shtëpi, por se do të rriteshin faturat për shumicën e qytetarëve.

Ajo tha se kjo është vërtetuar në vitin 2017, gjatë qeverisjes LDK-PDK.

“Në vitin 2017 kur LDK dhe PDK me insistim dhe ndërhyrje politike, kanë ndërhyrë në ZRRE për ta hequr bllok tarifën, 80 përqind e familjeve kanë pasur rritje të konsumit të energjisë, ndërsa 20 pëqindëshi që kanë shpenzuar më shumë, vetëm ata kanë pasur ulje. Kjo është çfarë do të ndodhte, këto janë shifrat Pikërisht është kjo heqje e bllokut që na ka sjellë deri te eskplodimi i kërkesës për energji në masa jonormale, pa nxitje të eficiencës”, tha Rizvanolli.

Kritika ndaj ekzekutivit kishte edhe deputeti nga radhët e Aleancës për Ardhmërinë e Kosovës, Pal Lekaj.

Ai tha Qeveria Kurti për katër vjet mandat e rriti dy herë çmimin e energjisë për qytetarët dhe se riktheu gjendjen e para 20 vjeteve me reduktime.

“Është për të ardhur keq që edhe pse jemi në vitin 2024, që Kosova e ka krejt nëntokën e ka plot me qymyr, të flasim për reduktime, për cmime të larta të energjisë dhe probleme tjera që lidhen me energjinë. Kemi një qeveri që ka lanë anash sektorin e energjisë, nuk ka asnjë strategji dhe as veprime për ringjalljen e sektorit…Një Qeveri që u pagoi serbëve 115 milionë euro rrymë në kurriz të qytetarëve shtetas të Kosovës. Një qeveri që dy herë bëri rritjen e çmimit të energjisë për qytetarët. Një qeveri e cila nga katër vite në pushtet, riktheu gjendjen e para 20 vjetëve me reduktime me muaj të tërë”, tha Lekaj.

Deklaratat e Rizvanollit nxitën edhe reagimin e Kreut të PDK’së, Memli Krasniqit. Ai deklaroi se Qeveria Kurti ua ka dhënë qytetarëve nga 100 euro dhe pas dy ditësh ua ka marrë përmes faturave të rrymës.

“Faturat e muajit të kaluar e kanë tmerruar secilën familje. E këtu kemi zyrtarë të qeverisë që jetojnë në një tjetër realitet. A mund të na tregoni se sa janë rritur të hyrat dhe profiti e KEDS-it dhe KESCO-s në krahasim me qeverisjet e kaluara”, tha Krasniqi.

“Ua keni dhënë nga 100 euro, pas dy ditësh ua keni marrë me fatura të energjisë”, shtoi ai.

Nga PDK’ja reagoi edhe deputeti Rashit Qalaj, i cili tha se rritja e çmimit të energjisë elektrike erdhi si shkak i keqmenaxhimit të KEK-ut nga Nagip Krasniqi, kryeshefi i arrestuar i lidhur me LVV-në.

Qalaj tha në seancën e Kuvendit se Krasniqi qëllimisht zgjodhi “dështimin” për të blerë rrymë, siç tha ai “nga miqtë e bashkëpartiakut të tij, Martin Berishaj”.

“Rritja e çmimit ndodhi për shkak të keqmenaxhimit me asetet e KEK-ut nga partiaku juaj, z. Krasniqi, i cili kishte mënjanuar sugjerimet e ekspertëve profesionalë të KEK-ut për t’i riparuar blloqet me kohë dhe në mënyrë profesionale”, tha ai.

Ndërkohë, deputeti i LDK’së, Avdullah Hoti tha se çmimi i energjisë është shtrenjtuar për 115 përqind, derisa drejtoi kritika për mungesën e investimeve për kapacitete të reja energjetike.

“E vërtetë është se mandati po kryhet. Nuk ka kapacitetetë reja energjetike dhe as nuk ka plan për ndërtimin e kapaciteteve të reja. E vërteta është se çmimi i energjisë është shtrenjtuar 115%. E vërteta është se janë subvencionuar hotele, markete, ambasada, aeroporti dhe plot biznese tjera joesenciale”, tha Hoti.

“Tani ju mund të thoni që për 3 vjet nuk ndërtohet një termocentral i ri, por mund të fillohet. Do të duhej të kishte filluar brenda kësaj periudhe”, tha ai.

As në seancën e sotme nuk munguan përplasjet. Këtë herë përplasje kishte mes Shefes së Grupit Parlamentar të VV’së, Mimoza Kusari-Lilës dhe deputetes së LDK’së, Hykmete Bajramit.

Gjithçka nisi kur Bajrami kërkoi që të flasin deputetët e pushtetit, pasi për Kusari-Lilën tha sa s’është pjesë e LVV-së.

“Ka qenë pjesë e të gjitha qeverive në të kaluarën, ka qenë zëvendëskryeministre kur është privatizuar distribucioni dhe ka qenë anëtare e Komitetit të Privatizimit si ministre e Tregtisë atë kohë”, tha ndër tjerash Bajrami, duke iu referuar kryetares së Alternativës.

Deklaratën e Bajramit, Kusari-Lila e cilësoi shpifje.

“Është e vërtetë që qytetarët mbajnë mend, për atë e kanë sjellë Lidhjen Demokratike në 12%. Dhe në shpifjen e saj se unë kam qenë pjesë e të gjitha qeverive, po du me i thënë veç listoji në cilat qeveri kam qenë pjesë. Përveç njërës, unë kam qenë vetëm një herë në jetën time në një mandat qeverisës ministre, ti ke qenë në tri”, tha ajo, duke shtuar se partisë LDK-së ia kanë treguar vendin qytetarët.

Bajrami, në kundëreplikë, i tha Kusari-Lilës të dalë e vetme në zgjedhje “për me e pa ku e ke vendin”.

“Zonja Kusari, unë nuk shpifi. Qytetarët e dinë shumë mirë kush je ti. Për me e pa ku e ke vendin, urdhëro, del në zgjedhje e vetme, mos u kacavjerr nëpër listat e partive tjera. Për me e pa ku e ke vendin. Ashtu të matet vendi ty dhe unë e ti matemi. Vetëm kur të dalësh vetëm, kur të dalësh me Alternativën. Tregom kush e njeh një anëtar tjetër të Alternativës?”, tha ajo.

“Nuk ka parti politike të cilës nuk iu ke kavavjerrë”, tha ndër tjerash Bajrami.

Kusari-Lilën e përmendi në fjalën e tij edhe ish-deputeti i VV’së, tash deputet i pavarur, Haki Abazi.

“Edhe sot ka Mimoza Kusari fytyrë me dalë me folë për suksese dhe pret mirëkuptim për Veriun që pas tri viteve, pas shpenzimit të 120 milionë eurove dhe me një kontratë me Elektroseverin. Bëjeni publike kontratën, ta shohim cila është marrëveshja me Elektroseverin. Pastaj flasim cili është suksesi aty. Mos u fsheh si në rastin e Komisionit Hetimor për Rezervat shtetërore”, ka thënë ai.

Abazi tha se qytetarët po përballen me varfëri energjetike dhe se shteti po menaxhon me këtë varfëri.

“Qytetarët po përballen me varfëri energjetike. Këtu ka menaxhim të varfërisë energjetike. Këtu përfundon debati i aspektit politik të qasjes juj. Dua të iu kujtoj se z.Edi Rama se në vitin e parë e ka kthyer sistemin e shpërndarjes së energjisë nga CEZ tek shteti. Në vend se të vajtoni, merrni kthejeni në pronësi të shtetit monopolin natyror të shpërndarjes së energjisë elektrike. Por s’jeni të interesuar”, ka shtuar ai.

Si zakonisht, opozitarët e përmendën ‘tregtarin e rrymës” Martin Berishaj, por në fund gjithçka përfundoi pa ndonjë efekt pasi në Kuvend nuk pati kuorum për ta hedhir në votim draftrezolutën.

Një vajzë ka mbetur e lënduar pas rënies së çatisë së objektit të Komunës së Prishtinës në lagjen Arbëria.

Shefi i Urgjencës së Prishtinës, Avdyl Pacolli, thotë se viktima ka pësuar politraumë me lëndime të shumëfishta, por ajo është jashtë rrezikut për jetë.

“Flitet për një paciente të gjinisë femërore e cila e ka pësu një politraumë me lëndime të shumëfishta, ndërkohë është në parametrat vital për jetën.

Ekipet e Qendrës së Mjekësisë Urgjente kanë dalë në vendin e ngjarjes pas thirrjes së qytetarëve edhe të Policisë.

Më pas vajzën e kanë dërgu në Qendrën Emergjentë pranë SHSKUK-së.

E njëjta është duke marrë tretman në qendrën emergjente dhe është duke iu nënshtruar ekzaminimeve klinike-diagnostike“, tha Pacolli për Sinjalin.

Rasti është konfirmuar edhe nga Policia e Kosovës.

Sipas policisë rreth orës 13:00, është raportuar se në rrugën “Nora e Hotit”  në Prishtinë,  një person ka marrë lëndime si pasojë e goditjes  nga materiale që janë shkëputur nga çatia e një objekti.

“Policia menjëherë ka dalë në vendin e ngjarjes dhe mbështetur në informacionet e para është raportuar për një person të lënduar, femër,  e cila është dërguar në QKUK për trajtimin e nevojshëm mjekësor. Aktualisht policia ka nisur punën për zbardhjen e plotë të të gjitha  rrethanave që karakterizojnë ngjarjen”, thuhet në njoftimin e policisë

Presidentja e vendit, Vjosa Osmani ka takuar Ministrin e Mbrojtjes, Ejup Maqedoncin dhe Komandantin e FSK-së, Bashkim Jasharin.

Presidentja po ashtu  ka vlerësuar se Ushtria e Kosovës po fuqizohet dita-ditës.

Avokati i Popullit i është drejtuar Gjykatës Kushtetuese lidhur me Ligjin për Zgjedhjet e Përgjithshme në Republikën e Kosovës, me kërkesë për vlerësimin e përputhshmërisë me Kushtetutën. Për këtë ligj, Presidentja Vjosa Osmani kishte pasur një diskutim të tensionuar me Kryeministrin Albin Kurti, raporton Express.

Dispozita e kontestuar ka të bëjë me kuotën gjinore. Sipas Avokatit të Popullit, përcaktimi i kuotës “së paku 30%” për secilën gjini e përligj trajtimin e pabarabartë të grave.

“Dispozita  e kontestuar ( neni 28 Ligjit nr. 08/L-228 për Zgjedhjet e Përgjithshme në Republikën e Kosovës) ka lënë përkufizimin e njëjtë nga ligji i kaluar, ashtu që ka përcaktuar se “Në listën e kandidatëve të secilit subjekt politik së paku tridhjetë (30%) për qind janë meshkuj dhe së paku tridhjetë (30%) për qind janë femra; me nga një kandidat të secilës gjini përfshirë së paku njëherë në secilin grup prej tre kandidatëve, e që numërohet nga kandidati i parë në listë.”, thuhet në njoftim.

Avokati i Popullit ka kërkuar nga Kushtetuesja të vlerësojnë “Nëse dispozita e  kontestuar është në përputhshmëri me nenin 7 [Vlerat] të Kushtetutës; – Nëse dispozita e kontestuar është në përputhshmëri me nenin 24 [Barazia para Ligjit] të Kushtetutës; dhe – Nëse dispozita e  kontestuar është në përputhshmëri me nenin 45, paragrafi 1 [Të Drejtat Zgjedhore dhe të Pjesëmarrjes] të Kushtetutës.

“Kërkesa është parashtruar pasi që Avokati i Popullit është i bindur se përcaktimi i kuotës “së paku 30%” për secilën gjini e përligj trajtimin e pabarabartë të grave. Një rregullim i tillë ligjor ka dëshmuar në praktikë se gratë në vazhdimësi mbeten të nën-përfaqësuara në listat zgjedhore,  duke u përmbushur vetëm minimumi i përcaktuar me ligj, e që ky minimum nuk pasqyron barazi për grate”, thuhet në njoftim.

Qelaj kishte paralajmëruar se Ligjin do ta dërgonte në Kushtetuese, në takimin e tretë të Këshillit për Demokraci dhe të Drejta të Njeriut. Pas fjalëve të Qelajt, Presidentja Vjosa Osmani kishte pasur një diskutim të tensionuar me Kryeministrin Albin Kurti.

Fjalët e Qelajt nuk i pëlqyen kryeministrit Albin Kurti, i cili deklaroi se 10 ligje të Kuvendit që përmbajnë reforma të rëndësishme për shtetin, për drejtësi dhe punësim, kanë mbetur duke u vlerësuar në Gjykatën Kushtetuese, janë rrëzuar ose “deformuar”, siç tha ai, nga kjo gjykatë.

Zëdhënësi i Qeverisë, Përparim Kryeziu shkroi në Facebook se Kurti dhe Osmani po diskutonin rreth paralajmërimit të Avokatit të Popullit se ligjin për zgjedhje mund ta dërgojnë për shqyrtim në Kushtetuese.

“Kur pas Kryeministrit e mori fjalën Avokati i Popullit, Naim Qelaj, ai filloi të përsiatej qysh po mendon ta dërgojë edhe një ligj tjetër në Gjykatën Kushtetuese, kësaj radhe Ligjin e ri për Zgjedhje, që u votua në lexim të dytë në Kuvend sivjet më 8 qershor, u shpall në gazetën zyrtare më 3 korrik dhe hyri në fuqi më 18 korrik 2023. Në atë xhirim shihet Kryeministri Kurti duke i folur Presidentes Osmani për Avokatin e Popullit Qelaj dhe këtë çështje të fjalës së tij”, shkroi Kryeziu, pa dhënë hollësi për diskutimin mes Kurtit dhe Osmanit.

Presidentja Vjosa Osmani atë ditë i propozoi Avokatit të Popullit që të merret vesh me partitë politike për ta bërë një amandament “që e trajton këtë mospërputhshmëri me ligjin për bararazinë gjinore”, në ligjin për zgjedhjet dhe që ta procedojnë tutje duke e shmangur një pritje për vendimin e Gjykatës Kushtetuese. Kështu, ajo tha se “do të zgjidhej ky problem shumë më mirë”.

“Faleminderit zoti avokat. Ndoshta një përpjekje të fundit para se ju ta dërgoni ligjin në Gjykatën Kushtetuese, në qoftë se partitë politike pajtohen ne mund ta bëjmë një amandament në ligjin për zgjedhjet e përgjithshme dhe ta procedojmë sa më parë që të jetë e mundur në mënyrë që të trajtohet çështja që e adresova edhe, unë edhe ju. Nuk e di sa ka mbetur kohë. Ndoshta edhe një muaj ose dy, përafërsisht, kështu që, në qoftë se edhe mazhoranca, edhe partitë opozitare do të pajtoheshin, do të zgjidhej ky problem shumë më mirë, në mënyrë që pastaj mos të presim dhe ndoshta edhe një vit deri sa të trajtohet kërkesa juaj në Gjykatën Kushtetuese dhe të bllokohet një prej ligjeve që janë fundamentale në procesin tonë të reformave, dhe për mësysh ka qenë ndoshta prej ligjeve të pakëta që është votuar edhe nga shumica, edhe opozita. Pra, është një prej rasteve të rralla ku i gjithë Parlamenti pajtohet rreth një ligji dhe ky ka qenë një prej të tillëve”, deklaroi Osmani.

Pasi doli jashtë Osmani u pyet për diskutimin me Kurtin. Ajo tha se po flisnin për ligjin për zgjedhjet.

“Për ligjin për zgjedhjet e përgjithshme dhe çështjen e përqindjes së grave në lista. Kështu që është përpjekje e vazhdueshme”, kishte thënë presidentja.