Tregjet e kriptovalutave po shënojnë një hov të fuqishëm në vitin 2025, me kapitalizimin total të tregut që është rritur me 9,9% që nga fillimi i vitit, duke përfaqësuar një shtesë prej mbi 600 miliardë dollarësh amerikanë. Pas një rënie të shkurtër në tremujorin e parë, tregjet u rikuperuan fuqishëm në tremujorin e dytë dhe vazhduan trendin pozitiv në tremujorin e tretë, ku Bitcoin (BTC) dhe asetet e tjera kryesore digjitale shënuan rekorde të reja historike (ATH).
Në të njëjtën kohë, likuiditeti global M2 (tregues i sasisë së përgjithshme të parasë në qarkullim dhe depozitave) arriti nivelin më të lartë në katër vitet e fundit, me rritjen gjashtëmujore më të fortë që nga viti 2021. Edhe pse Banka Qendrore e SHBA-ve (Fed) po ruan një politikë të ashpër monetare, ajo tashmë ka ndaluar procesin e kufizimit sasior dhe ka sinjalizuar një kthesë të mundshme nëse ndryshojnë rreziqet ekonomike.
Nga ana tjetër, kushtet monetare në mbarë botën mbeten të favorshme, pasi shumica e ekonomive kryesore po zbatojnë politika fleksibile. Ky mjedis global po nxit prirjen ndaj rrezikut dhe po ringjall interesimin për asetet digjitale, të cilat po tërheqin gjithnjë e më shumë vëmendjen e investitorëve, institucioneve dhe tregjeve ndërkombëtare.
Bitcoin dhe Ethereum tejkalojnë indekset tradicionale: Ethereum udhëheq me 36%, Bitcoin ndjek me 18%
Në vitin 2025, kriptovalutat Bitcoin (BTC) dhe Ethereum (ETH) kanë realizuar performancë dukshëm më të mirë se indekset tradicionale financiare. Ethereum është rritur me rreth 36%, ndërsa Bitcoin ka shënuar një rritje prej 18%. Bitcoin po tregon rol të dyfishtë – si mbrojtje ndaj rreziqeve makroekonomike dhe si mjet për investime afatshkurtra, duke dëshmuar vlerën e tij në diversifikimin e portofolit.
ETF-të amerikane për BTC dhe ETH kanë tërhequr mbi 28 miliardë dollarë hyrje neto, duke u bërë nxitësit kryesorë të likuiditetit në tregun e kriptovalutave. Nëse miratohen ETF-të për altcoin-e, këto fonde mund të fuqizojnë më tej tregun.
Dominimi i Bitcoin-it është rritur nga 40% në 65,1% gjatë vitit, duke treguar një cikël të udhëhequr nga BTC për shkak të pasigurisë makroekonomike dhe kërkesës nga ETF-të dhe rezervat shtetërore. Aktualisht, dominimi është ulur në 57,2%, gjë që tregon një zhvendosje të kapitalit drejt altcoin-eve.
Staking-u i Ethereum ka arritur një rekord prej 35,8 milionë ETH, ose rreth 29,7% të furnizimit total, falë përditësimit Pectra dhe interesit në rritje nga investitorët institucionalë, duke forcuar më tej pozicionin e Ethereum në treg.
Stablecoin-et dhe sektori DeFi shënojnë rritje rekord: Kapitali hyn në kripto me hov të ri
Oferta e stablecoin-eve është rritur mbi 35%, duke arritur një rekord prej rreth 277,8 miliardë dollarësh. Ky rritim tregon për një fluks të ri kapitali dhe fuqi më të madhe blerëse në treg. Rregulloret më të qarta e kanë legjitimuar më tej përdorimin e tyre, duke zgjeruar rolin e tyre përtej tregtisë, në pagesa dhe shlyerje.
Kompani publike tashmë zotërojnë 1,07 milionë bitcoin (rreth 5,4% të furnizimit total) të shpërndarë në 174 firma, ku MicroStrategy mban gati 59%. Rezervat e Ethereum (ETH) janë rritur me 88,3% vetëm muajin e fundit, duke arritur 4,36 milionë ETH – rritja më e madhe mujore deri më tani.
Raporti mes bursave të decentralizuara dhe atyre të centralizuara (DEX/CEX) ka arritur nivele rekord në vitin 2025, me pjesën e tregut të DEX-ve prej 23,1% në tregtinë spot dhe 9,3% në kontratat futures, duke treguar aktivitet gjithnjë e më të madh në blockchain.
Vlera e aseteve në platformat DeFi është rritur me 65% duke arritur një rekord prej 79,8 miliardë dollarësh, ndërsa huamarrja është rritur me 80%, e shoqëruar me rritjen e përdorimit të protokolleve monetare.
Aksionet e tokenizuara kanë shënuar rritje të shpejtë, duke arritur kapitalizimin e tregut prej 349 milionë dollarësh, me interes në rritje dhe hyrje të brokerëve tradicionalë dhe atyre kripto. Ky trend ndjek bum-in e mëparshëm të DeFi, duke treguar për zhvillimin e mëtejshëm të tregut.
Këto tregues konfirmojnë se tregu i kriptovalutave në rajon po forcohet dhe po bëhet një pjesë gjithnjë e më e rëndësishme e sektorit financiar, me potencial të madh për të ardhmen
