Një 49-vjeçar ka humbur jetën sot në mëngjes në një aksident trafiku që ka ndodhur afër liqenit të Badovcit. Sipas policisë, në aksident janë përfshirë një kamion dhe një veturë, transmeton IndeksOnline.

“Sot rreth orës 09:00, është pranuar informata për një aksident trafiku rrugor të ndodhur në rrugën magjistrale Prishtinë-Gjilan, respektivisht në fshatin Kishnicë. Nga informatat e para bëhet e ditur se në aksident janë përfshirë një veturë dhe një kamion dhe si pasojë një person, mashkull, 49 vjeç, ka humbur jetën”, thuhet në njoftimin e policisë.

Policia ka dalë në vendin e ngjarjes dhe po ndërmerr masat e nevojshme për lehtësimin e qarkullimit rrugor si dhe ka nisur punën për hetimin e shkaqeve që kanë sjellë deri te aksidenti.

Mbledhja e Kryesisë së Kuvendit që u parapa të mbahej sot ka dështuar, në mungesë të kuorumit.

Shefi i GP të PDK-së, Abelard Tahiri ka thënë se si subjekt politik nuk do të votojnë asnjë ligj, përfshirë këtu edhe marrëveshjet ndërkombëtare

“As një ditë të vetme nuk e meriton që ky Kuvend të mblidhet. PDK kërkon shpërbërjen e këtij Kuvendi dhe që vendi të shkoj në zgjedhje të parakohshme. Si mund të vazhdohet tutje kur kjo Qeveria si pasojë e veprimeve të saja e ka pruar Kosovën në sanksione të ndryshme nga SHBA dhe BE. Ky parlament, kjo qeveri nuk është kredibile më dhe ne kërkojmë zgjedhje të parakohshme’, tha ai ndër të tjera.

Kurse shefja e Grupit Parlamentar të Lëvizjes Vetëvendosje, Mimoza Kusari-Lila, ka thënë se përkundër dështimit të mbledhjeve do ta vazhdojnë punën ashtu siç e lejon Kushtetuta.

Sipas saj opozita duhet t’i tregojë arsyet e mospjesëmarrjes nëpër mbledhje.

“Për neve është e papranueshme, marrë parasysh se kemi ligje që presin për votim e që janë me rëndësi për jetën e qytetarëve”, ka thënë ajo.

Mediat hungareze kanë njoftuar se një ushtari të KFOR-it hungarez i është amputuar këmba pasi kishte marrë lëndime gjatë tensioneve në komunën e Zveçanit më 29 maj.

Media hungareze, Telex, ka njoftuar se disa nga ushtarët hungarezë të plagosur u dërguan në Hungari me aeroplan të mbrojtjes kombëtare menjëherë të nesërmen, ku pastaj ministri i Mbrojtjes Kombëtare Kristóf Szalay-Bobrovniczky raportoi për gjithsej 27 ushtarë të plagosur.

Ministria ka thënë se shumica e ushtarëve janë kthyer në shtëpitë e tyre, por gjendja e dy ushtarëve është ende e rëndë dhe ata janë ende duke u trajtuar në spital.

“Për rikuperimin e tyre, Forcat Hungareze të Mbrojtjes dhe mjekët ushtarakë po bëjnë gjithçka në maksimum. Pavarësisht nivelit të lartë të kujdesit mjekësor, pas një konsultimi paraprak me pacientin, duke marrë parasysh rezultatet e trajtimeve të ofruara që nga lëndimi, një nga rastet e kishte të obligueshme amputimin e një gjymtyre, e cila u krye të premten në Institutin Kombëtar të Rehabilitimit Mjekësor. Operacioni ka shkuar mirë, gjendja e pacientit është stabile”, thuhet në njoftimin e ministrisë.

Në protestën e 29 majit në veri, në qytetin e Zveçanit serbët kishin sulmuar me gjësende të forta trupat e KFOR-it, derisa këta po qëndronin para objektit të komunës.

Misioni paqeruajtës i NATO-s kishte ndërhyrë pasi paraprakisht i pati paralajmëruar, por ata nuk ishin bindur. Gaz lotsjellës, zjarr dhe shtëllunga tymi patën përfshirë zonën, ndërkohë që janë dëgjuar edhe sirena dhe shpërthime.

Njëzet e tre të burgosur në Qendrën Korrektuese të Smrekonicës në Vushtrri punojnë me orar të plotë në kompani private në komuna të ndryshme të Kosovës.

Koncepti është pjesë e një udhëzimi administrativ që është miratuar para katër vjetësh. Përfituesit e tij thonë se u ndihmon në risocializim.

A.G me padurim pret të zbardh dita dhe të lë burgun e të shkojë në punë.

Edhe pse i privuar nga liria, i burgosuri në fjalë punon pesë ditë në javë në biznesin e tij familjar në Prishtinë.

“Është një risocializim shumë i mirë. Është shumë e mirë kur fillon punë tre apo gjashtë muaj para se të dalësh nga burgu”, shprehet i burgosuri që tashmë punon edhe në restoran.

Nga viti 2021 ky 43-vjeçar vuan dënimin në qendrën korrektuese të Smrekonicës në Vushtrri për shkak të një aksidenti trafiku.

Njëjtë si ai janë edhe 23 të burgosur tjerë që kanë mbaruar pjesën më të madhe të dënimit e që punojnë në kompani private jashtë qelive të burgut.

Disa prej tyre me vetura personale, e disa të tjerë me transport publik, lënë qelitë e burgut në ora 6:30 për t’u rikthyer në orët e pasdites.

Gjatë kohës sa punojnë ata nuk kanë të drejt të dalin jashtë hapësirave të punës dhe autoritetet e burgut mund t’i monitorojnë.

Ata paguhen dhe kanë çdo përfitim si punëtorët tjerë.

Një tjetër i burgosur që tashmë punon në sektorin e ndërtimit, thotë se kyçja në jetën shoqërore pas gjithë viteve të izolimit ka qenë shumë e vështirë sidomos në aspektin e teknologjisë informative që ka përparuar shumë.

Për momentin vetëm qendra korrektuese në Smrekonicë e zbaton këtë praktikë të punësimit të burgosurve jashtë institucionit.

Aty janë duke vuajtur dënimin rreth 100 persona. Por për të përfituar mundësinë e punësimit jashtë grilave duhen plotësuar disa kushte.

“Së pari duhet ta ketë të përfunduar vuajtjen e gjysmës së dënimit dhe të jetë përfitues i benificioneve si vikend në shtëpi”, ka deklaruar Agron Thaçi, zëvendësdrejtor i burgut të Smrekonicës – Vushtrri.

Punësimi i të burgosurve është aplikuar për herë të parë në SHBA dhe tashmë zbatohet në shumë vende të botës./REL/

Një sfidë në TikTok ku njerëzit duhet të hidhen nga pjesa e pasme e anijeve ndërsa lëvizin me shpejtësi të madhe është bërë shkak për katër vdekje në Alabama, SHBA.

Sfida, e cila është popullarizuar në TikTok, tregon individë që kryejnë aktivitete rrezikshme ujore. Ata që marrin pjesë në sfidë gjatë kohës që varka lëviz hidhen në pjesën e pasme të saj.

Tani, zyrtarët në Alabama kanë thënë se sfida e re iu ka marrë jetën katër personave. Zyrtarët thanë se në gjashtë muajt e fundit, atyre iu desh të përballeshin me katër ngjarje të tilla.

Një përfaqësues i rojes bregdetare tha:

Gjashtë muajt e fundit kemi pasur katër mbytje. Ata po bënin një sfidë të TikTok. Është sfida ku hipni në një varkë që ecën me shpejtësi të lartë, hidheni nga ana e varkës. Katër personat qê humbën jetën thyen qafën gjatë hedhjes së menjëhershme në ujë.

Ai tha se një incident ishte në shkurt, kur viktima ishte një baba me tre fëmijët e tij, gruan dhe familjarët që regjistruan sfidën vdekjeprurëse të tij.

Udhëheqësit e NATO-s pritet të konfirmojnë në samitin në Vilnius se situata në Kosovë është serioze dhe se misioni i NATO-s, KFOR, është atje për të garantuar sigurinë e të gjithë qytetarëve, përfshirë edhe të pakicës serbe në veri, thotë Milan Niç, nga Këshilli Gjerman për Marrëdhënie me Jashtë.

Duke folur në një intervistë për Radion Evropa e Lirë, Niç thotë se telashet do të ishin shumë më të mëdha nëse NATO-ja nuk do të ishte në Kosovë.

“Mendoj se [Kosova] është më afër një konflikti të hapur sesa Bosnja. Dhe është një nivel ndryshe i konfliktit, sepse keni sulme fizike ose konfrontime në veri, keni struktura paralele, keni shpërthime, ku një incident i vogël mund të çojë në diçka më të madhe”, thotë Niç, ekspert për Ballkanin Perëndimor dhe zgjerimin e NATO-s.

Duke u ndalur te Serbia, ai thotë se presidenti i saj, Aleksandar Vuçiq, mund ta luajë edhe për kohë të gjatë lojën “edhe Perëndimi, edhe Rusia”.

Radio Evropa e Lirë: Dua të nis me Ukrainën. A do të marrë ajo garanci për sigurinë në samitin e NATO-s në Vilnius?

Milan Niç: Varet se çfarë nënkuptoni me garanci të sigurisë. Ukraina mund të shpresojë të ketë diçka më shumë nga samiti i Vilniusit, por jo anëtarësim të plotë. Diplomatët kanë punuar për formulime të sakta, që do të mirëpriten nga të gjitha vendet anëtare, sepse ka opinione të ndryshme për hapat e ardhshëm ndaj Ukrainës. Nga Vilniusi do të dalë një “Bukuresht Plus”, por se çfarë do të jetë saktësisht, është çështje e diskutimeve diplomatike. [v.j. në samitin në Bukuresht në vitin 2008, NATO-ja i ka mirëpritur aspiratat euro-atlantike të Ukrainës dhe ka rënë dakord që ky vend do të bëhet anëtar i NATO-s].

Radio Evropa e Lirë: Po Suedia? A do t’i bashkohet NATO-s?

Milan Niç: Shpresoj shumë për vitin e ardhshëm. Fatkeqësisht, qëllimi që të gjitha vendet anëtare ta ratifikojnë anëtarësimin e Suedisë përpara samitit të Vilniusit, nuk është arritur, sepse Turqia nuk e ka hequr veton e saj dhe Hungaria, po ashtu, e ka shtyrë ratifikimin deri në vjeshtë. Gjërat po lëvizin, ka shumë presion mbi Turqinë, por presidenti turk, Recep Tayyip Erdogan, insiston se jo të gjitha kushtet janë përmbushur.
Pres që nga samiti i Vilniusit të ketë një sinjal të fuqishëm politik, që do të nënvizojë se Suedia është pothuajse në NATO, se të gjithë anëtarët – përveç dy – e kanë ratifikuar anëtarësimin dhe se aleanca mund ta mirëpresë Suedinë si anëtare me të drejta të plota.

Radio Evropa e Lirë: A ka treguar lufta në Ukrainë se NATO-ja është garanci për sigurinë?

Milan Niç: Unë mendoj shumë kështu, sepse Ukraina është sulmuar për faktin se nuk ka qenë në NATO. Rusia, qartazi, shënjestron vendet më të dobëta.

Shikojeni edhe Ballkanin Perëndimor. Është e rëndësishme që tri nga gjashtë vendet e këtij rajoni janë në NATO. Dhe, mund të imagjinojmë se çfarë do të ndodhte, për shembull, në Kosovë sikur të mos e kishte atë kornizë të sigurisë që ka, pra KFOR-in [misionin paqeruajtës të NATO-s].

Pasi Rusia ka nisur luftën në Ukrainë, nuk ka më oreks për paqartësi apo zona gri në Evropë. Ose jeni në rrugë drejt NATO-s, ose në NATO. [Në të kundërtën] jeni të cenueshëm ndaj kërcënimeve hibride ruse.

Radio Evropa e Lirë: Çfarë do të ndodhte nëse NATO-ja nuk do të ishte në Kosovë?

Milan Niç: Do ta them me një fjali: Telashet do të ishin shumë më të mëdha.

Radio Evropa e Lirë: E keni përcjellë krizën e fundit në veri të Kosovës…

Milan Niç: Kam ndaluar së numëruari krizat midis Kosovës dhe Serbisë. Nuk janë të mira për asnjërën prej palëve. Po ua humbin durimin edhe Shteteve të Bashkuara dhe aleatëve evropianë. Sepse, është një shpërqendrim nga gjëja kryesore që po ndodh në Evropë [lufta në Ukrainë] e që do ta përcaktojë edhe të ardhmen e Serbisë dhe Kosovës. Pra, është për keqardhje. Por, është edhe çështje e zgjedhjeve politike të të dy liderëve [Kosovës dhe Serbisë] se sa larg do të shkojnë me këto tensione dhe me veprime të njëanshme. Veprimet e njëanshme kanë ardhur më shumë nga Beogradi, por gjatë vitit të fundit edhe nga Prishtina.
Radio Evropa e Lirë: Për shkak të krizës në veri, Kosova është përjashtuar nga një stërvitje e madhe ushtarake, e udhëhequr nga SHBA-ja dhe aleatë të tjerë të NATO-s. Çfarë mesazhi ka qenë ky për Kosovën?

Milan Niç: Shtetet e Bashkuara, thjesht, kanë dashur të dërgojnë një sinjal se nuk mund të rrezikosh më shumë tensione pa pasoja.

Radio Evropa e Lirë: Sa larg mund të shkojë NATO-ja me Kosovën, meqë misioni i saj është përgjegjës për sigurinë…

Milan Niç: Nëse flasim për samitin në Vilnius, mendoj se do të ketë një rikonfirmim në deklaratë se situata është serioze dhe se NATO-ja është atje për të garantuar sigurinë e të gjithë qytetarëve, përfshirë këtu edhe pakicën serbe në veri.

Është çështje e Qeverisë së Kosovës se deri në çfarë mase do që të jetë në aleancë me mbështetësit e saj kryesorë në Perëndim dhe t’i bashkërendojë me ta hapat diplomatikë edhe ndaj Serbisë. Sepse, në fund të fundit, ka të bëjë me koordinimin dhe ndërtimin e aleancave. Dhe historia e Qeverisë aktuale të Kosovës në këtë drejtim nuk është shumë e mirë.

Radio Evropa e Lirë: Kosova dhe Bosnje e Hercegovina kanë kërkuar anëtarësim të përshpejtuar në NATO. Sa reale është kjo?

Milan Niç: Bosnja është shumë më përpara. Në fakt, Bosnja është edhe më përpara se ajo që Ukraina pritet të marrë nga samiti i Vilniusit, edhe më përpara se Gjeorgjia, e cila po ashtu ka kërkuar anëtarësim. Të mos harrojmë që Bosnja ka një plan veprimi për anëtarësim, edhe pse quhet me një emër tjetër. Por, hapat e ardhshëm të saj i ka bllokuar mungesa e unitetit midis Sarajevës dhe Banjallukës. Udhëheqja aktuale e Republikës Sërpska e ka bërë të qartë se nuk do më shumë përparim dhe më shumë integrim në NATO.

Rasti i Kosovës është më i komplikuar, sepse janë katër vende të NATO-s që nuk e njohin ende Kosovën si shtet. Por, gjithashtu, ajo ka bashkëpunim intensiv me NATO-n, por që tani është pauzuar, për shkak të veprimeve të përgjithshme të Qeverisë së Kosovës, në përgjigje të ngjarjeve të shëmtuara në veri.

Radio Evropa e Lirë: NATO e ka identifikuar Bosnjën si zonë të mundshme për aktivitetet ruse. Sa është Kosova e brishtë ndaj tyre?

Milan Niç: Është me një nivel tjetër, krejtësisht të ndryshëm të brishtësisë. Mendoj se është më afër një konflikti të hapur sesa Bosnja. Dhe është një nivel ndryshe i konfliktit, sepse keni sulme fizike ose konfrontime në veri, keni struktura paralele, keni shpërthime, ku një incident i vogël mund të çojë në diçka më të madhe.

KFOR-i mund të jetë aty për ta parandaluar shndërrimin e këtyre incidenteve në diçka më të madhe. Por, dua të theksoj se, pavarësisht krizës së re në Bosnje e Hercegovinë dhe të gjitha tensioneve, atje nuk ka konfrontime fizike.

Radio Evropa e Lirë: Po Serbia? A mund të vijë një moment që, sikurse Finlanda dhe Suedia, ta ndryshojë mendjen për NATO-n?

Milan Niç: Jo, Serbia po luan me kartën e vendit neutral. Ajo e fsheh faktin se ka bashkëpunim mjaft intensiv me NATO-n, në interes të përbashkët. Presidenti serb, Aleksandar Vuçiq, e ka zotëruar këtë lojë, duke u sjellë si neutral, por, në të njëjtën kohë, duke forcuar marrëdhëniet me SHBA-në dhe duke qenë mjaft i cenueshëm ndaj ndikimit rus.
Radio Evropa e Lirë: Edhe për sa kohë mund ta luajë Serbia këtë lojë ?

Milan Niç: Mendoj se mund ta luajë shumë gjatë, sepse nuk varet vetëm prej saj, varet edhe prej situatës globale. Nëse lexoni analiza për ndikimin e luftës ruse në rendin global, ajo është një shtytje e madhe për të ashtuquajturat fuqi të mesme, si Turqia dhe Izraeli, pasi mund ta rrisin – në njëfarë mënyre – hapësirën e manovrimit midis Perëndimit dhe Rusisë. Nëse nuk jeni një vend shumë i vogël dhe keni rëndësi strategjike, mund ta luani këtë lojë. Pra, hapësira e manovrave strategjike të Vuçiqit është rritur dhe kjo është ajo që [kryeministri i Kosovës, Albin] Kurti e ka nënvlerësuar.

Serbia, prej fillimit, ka dërguar municione në Ukrainë përmes palëve të treta. Nëse gjëja më e rëndësishme në Evropë tani është ndihma për Ukrainën, edhe vendet si Serbia – në mënyrë paradoksale – mund të kontribuojnë në këtë përpjekje.

Pas akuzave të rënda në drejtim të saj ka reaguar ministrja e Punëve të Jashtme Donika Gërvalla e cila ka përseritur atë që kishte thënë ditë më parë për BE-në se pa SHBA-në dhe NATO-n, BE-ja është një tigër prej letre, raporton Lajmisot.

Ajo gjithashtu ka hedhur kritika të shumta në drejtim të partive opozitare PDK-së dhe LDK-së, duke  i sfiduar publikisht që siç ka thënë “para se të mësyjnë me sulme personale dhe etiketime nga më absurdet, të na tregojnë saktë se cila nga shkronjat e citatit të mësipërm është e pasaktë apo e pavërtet”.

“Unë jam zëvendëskryeministre dhe ministre e Republikës së Kosovës, nuk jam zëdhënëse as e BE-së dhe as një mekanizmi tjetër. Si çdo politikan i përgjegjshëm, me fanatizëm dhe zë të lartë mbroj të vërtetën dhe interesin e vendit tim, dhe vetëm të vendit tim, kudo që më krijohet mundësia të flas, ashtu si edhe të tjerët mbrojnë interesin e vendeve apo organizatave që përfaqësojnë”, ka shkruar Gërvalla.

Ajo tuje ka deklaruar që një prej fatkeqësive të Kosovës sot është gjendja e mjerueshme e partive opozitare dhe përfaqësuesve të tyre.

“Si gjatë qeverisjes edhe tani në opozitë janë pa plan, pa strategji, pa vizion, pa dinjitet. Opozitë që përveç sulmeve personale, të bazuara në thashetheme dhe tituj bombastik dhe të pasaktë, asgjë nuk ofron”, ka shkruar tutje Gërvalla, raporton Lajmisot.

Gërvalla ka akuzuar gjithashtu  PDK-në që siç ka thënë e kanë përzenë nga Kosova kur ajo kishte vetëm 8 vjet.

“E sa për PDK-në, e cila tenton të na frikësojë që, nëse ajo vjen në pushtet, ne nuk paskemi më vend në Kosovë, mundem vetëm t’iu përkujtoj që nuk janë të parët që nuk dëshirojnë të më shohin as fizikisht në vendin tim. I kam pasur vetëm 8 vjet kur më kanë përzënë për herë të parë nga vendi im. Por ata që për 19 vjet me radhë (1980-1999) më privuan nga e drejta për t’u kthyer në vendin tim, madje as edhe sa për të kthyer eshtrat e babait në tokën e tij, janë ata që nuk kanë më vend në Kosovën e lirë”, ka shkruar Gërvalla./Lajmisot/ 

Ja postimi i plotë i saj:

“Një pyetje kyçe për sigurinë në Ballkanin Perëndimor është: A është BE-ja ajo që mund të garantojë sigurinë dhe paqen në Evropë?
Unë mendoj që ajo nuk është në gjendje dhe nuk ka kapacitet për ta garantuar sigurinë. Arsyet janë të qarta: mungon vullneti politik, mospajtimet brenda Bashkimit Evropian janë të mëdha dhe sa i përket sigurisë, pa SHBA-në dhe NATO-n, BE-ja është një tigër prej letre. BE-ja e di këtë dhe prandaj vazhdimisht lëshon pe, i ikën konfrontimit.”

I sfidoj publikisht “specialistët”, që para se të mësyjnë me sulme personale dhe etiketime nga më absurdet, të na tregojnë saktë se cila nga shkronjat e citatit të mësipërm është e pasaktë apo e pavërtetë.

Unë jam zëvendëskryeministre dhe ministre e Republikës së Kosovës, nuk jam zëdhënëse as e BE-së dhe as një mekanizmi tjetër. Si çdo politikan i përgjegjshëm, me fanatizëm dhe zë të lartë mbroj të vërtetën dhe interesin e vendit tim, dhe vetëm të vendit tim, kudo që më krijohet mundësia të flas, ashtu si edhe të tjerët mbrojnë interesin e vendeve apo organizatave që përfaqësojnë.

Një prej fatkeqësive të Kosovës është gjendja e mjerueshme e partive opozitare dhe përfaqësuesve të tyre. Si gjatë qeverisjes edhe tani në opozitë janë pa plan, pa strategji, pa vizion, pa dinjitet. Opozitë që përveç sulmeve personale, të bazuara në thashetheme dhe tituj bombastik dhe të pasaktë, asgjë nuk ofron.

E sa për PDK-në, e cila tenton të na frikësojë që, nëse ajo vjen në pushtet, ne nuk paskemi më vend në Kosovë, mundem vetëm t’iu përkujtoj që nuk janë të parët që nuk dëshirojnë të më shohin as fizikisht në vendin tim. I kam pasur vetëm 8 vjet kur më kanë përzënë për herë të parë nga vendi im. Por ata që për 19 vjet me radhë (1980-1999) më privuan nga e drejta për t’u kthyer në vendin tim, madje as edhe sa për të kthyer eshtrat e babait në tokën e tij, janë ata që nuk kanë më vend në Kosovën e lirë.

E për LDK-në, nuk po flas sonte. Po flasin kaq shumë vet, po vajtojnë, shajnë, mallkojnë e gënjejnë, saqë çdo fjalë nga ime do të ishte e tepërt.

Foto Ilustruese

Detaje të reja janë zbardhur nga ngjarja e rëndë e ndodhur ditën e sotme në plazhin e Vilë-Bashtovës, ku babai dhe dy djemtë e mitur u mbytën.

Një dëshmitar i ngjarjes, ka treguar i pari ishte fëmija e vogël që po luftonte për jetën, e më pas filluan ishte babai dhe djali tjetër, 15-vjeçar. Sipas tij, vendi ku u mbytën ishte larg bregut dhe roja bregdetare shkoi për t’i dhënë ndihmë por ishin shumë larg.

“Unë me sytë e mi pashë që i pari ishte fëmija i vogël që po luftonte për jetën, pastaj filluan të 3. Roja shkoi i pari për ti dhënë ndihmë por ishte shumë larg. Pastaj u futën të gjithë njerëzit.

Roja i bregdetit i kapi i pari. Vetëm bërtisnin njerëzit. Kur dolën, dolën të pajetë. Shpejt dolën nuk ishte faji asnjërit por i vetë personave.”- u shpreh pushuesi.

Juristi Kreshnik Spahiu tha në një intervistë për Euronews Albania se këmbëngulja e Albin Kurtit për të dalë kundër SHBA, Evropës dhe Anglisë është një qëndrim donkishotesk për të forcuar pushtetin e tij politik.

Sipas Spahiut, Kurti po bën një konspiracion imagjinar ndaj Perëndimit, pasi kufijt e Kosovës nuk i mbron policia e tijë por një ushtri e tërë e KFOR dhe NATO.

“Nëse SHBA, Evropa dhe Anglia kërkojnë ndryshim kufijsh kjo do të ndodhë brenda 24 orësh dhe këtë s’e ndal askush. Ky është një qëndrim donkishotesk. Kë ka Kosova aleat, nëse je kundër SHBA, Evropës dhe Anglisë? Kjo është një idiotësi imagjinare, për të forcuar pushtetin e tij politik. Kufijtë e Kosovës i mbron një ushtri, NATO dhe KFOR. Escobar e tha që e kemi me popullin e Kosovës jo me qeveritë. Kosova është shumë më jetëgjatë, liderët shkojnë e vijnë. Kosovë është strategjike për SHBA”, tha Spahiu.

Petar Petkoviq, drejtori të ashtuquajturës “Zyre për Kosovën”, në Qeverinë e Serbisë, i ka reaguar Xhelal Sveçlës, ministrit të Punëve të Brendshme të Kosovës, i cili të dielën ka deklaruar se “nuk është kundër popullit serb, por kundër planeve shoviniste të Serbisë”.

Pas kësaj dekalrate, Petkoviq ishte i ashpër duke e quajtur Sveçlën si “ekstremist”.

Madje, Petkoviq ka eskaluar edhe më tej, duke e quajtur si “njësite parapolicore“, Policinë e Kosovës në Veri, që sipas tij ”terrorizojnë serbët”.

Ai madje ka thënë se Sveçla ka aktakuza për gjuajtjen me gurë të Policisë së Kosovës, si dhe veturave të EULEX’it.

“Qëllimi i vetëm i përpjekjeve obsesive të Sveçlës për të kriminalizuar serbët nga veriu i Kosovës është të justifikojë praninë e paligjshme të njësive të tij parapolicore në veri të Kosovës, ku ata terrorizojnë popullin serb ditë e natë. Duke folur për krimin, do të ishte mirë që Sveçla të largohej nga vetja dhe nga aktakuzat që janë ngritur me vite ndaj tij për sulmin me gurë ndaj pjesëtarëve të Policisë së Kosovës, por edhe për përmbysjen e veturës së misionit të EULEX-it. Kështu që në vend të Sveçlës duke i sjellë serbët në mënyrë të paligjshme në njohuritë e supozuara të drejtësisë dhe të drejtave, ai së pari duhet të ndalojë së ikuri nga e njëjta e drejtë dhe drejtësi”, ka propaganduar Petkoviq.

Serbia reagon ashpër ndaj prezencës së Policisë së Kosovës në pjesën veriore të Kosovës.

Por Qeveria e Kosovës thotë se janë duke e ruajtur rendin duke arrestuar kriminelët në atë pjesë të vendit.